Кыргыз Республикасынын Жогорку Кеңешинин төрагасы Нурланбек Турганбек уулу «Эти Бакыр Терексай» тоо-кен ишканасынын иши менен жакын таанышты. Иш сапардын жүрүшүндө конокту Жалал-Абад облусунун губернаторунун орун басары Н.М.Эрматов, Чаткал районунун акими Сеңирбаев А.Ж. жана ишкананын башкы директорунун биринчи орун басары Канымбетов Н.К. коштоп жүрүштү. Төрага «Эти Бакыр Терексай» ЖЧКсынын ишмердүүлүгү менен таанышып, кыргыз-түрк тоо-кен ишканасынын ишин жогору баалады.
Официалдуу сапар Кыргызстан менен Түркиянын тоо-кен тармагындагы кызматташтыгынын маанилүүлүгүн белгиледи. Жогорку Кеңештин төрагасы “Эти Бакыр Терексай” компаниянын Чаткал районунун, өзгөчө Терексай аймагынын экономикасын өнүктүрүүгө, жергиликтүү калк үчүн жумуш орундарын түзүүгө кошкон зор салымын белгиледи.
Иш сапардын жүрүшүндө Терек-Сай өндүрүшүн мындан ары өнүктүрүүнүн келечеги жана анын аймактын туруктуу өнүгүүсүнө кошкон салымы талкууланды. КР Жогорку Кенештин төрагасы Нурланбек Турганбек уулу “Эти Бакыр Терексай” мындан ары да ийгиликтүү ишмердүүлүгүн улантып, Кыргызстан менен Түркиянын ортосундагы экономикалык байланыштын чыңдалышына салымын кошот деген ишенимин билдирди.
– Жогорку Кеңештин төрагасынын “Эти Бакыр Терексай” ишканасына болгон иш сапары тууралуу кыскача репортажды “NewTV” телеканалынын журналисттери “Күнжуруш” маалымат программасына дагы даярдашкан.