Тажрыйба алмашуу жана кесиптик байланыштарды бекемдөө максатында кыргыз-түрк компаниясы «Эти Бакыр Терексайдын» кызматкерлери Кыргызстандын эң ири алтын кендеринин бири болгон — Кумтөр кенине таанышуу сапары менен барышты.
Кумтөр Голд Компани компаниясынын адистери меймандарга өндүрүштүн негизги объектилери боюнча экскурсия уюштурушту: ачык карьер, алтын ылгоочу фабрикасы (АЫФ), оор техникаларды тейлөөчү бөлүм, калдыктар сактоочу жай жана жумушчулар лагери.
Сапардын жүрүшүндө өндүрүштүк процесстердин уюштурулушу, өнөр жай коопсуздугунун жана экологиялык талаптардын сакталышы боюнча тажрыйба бөлүшүү болду. Адистер бийик тоолуу шарттарда иш алып баруунун өзгөчөлүктөрү жана башкаруу тажрыйбалары менен бөлүшүштү.
«Эти Бакыр Терексайдын» өкүлдөрү эмгек шарттарынын жогорку деңгээлде уюштурулганын, коопсуздук эрежелерине кылдаттык менен мамиле жасаларын белгилешти. Ошондой эле кесиптештери менен адистиктер боюнча пикир алмашууга жана келечектеги кызматташтык үчүн байланыштарды түзүүгө мүмкүнчүлүк алышты.
4000 метр бийиктиктеги мындай сапар биринчи жолу болуп жаткан жок жана ар дайым кесиптик ынтымак жана урматтоонун алкагында өтөт. Эки компания тең Кыргызстандагы алтын өндүрүш тармагында алдыңкы орундарда турушат жана мындай жолугушуулар жоопкерчилик менен башкаруунун жана мыкты тажрыйбалардын жайылышына өбөлгө түзөт.
